Azərbaycanda dekabrın 23-də keçiriləcək bələdiyyə seçkilərində iştirak etmək üçün müraciət edən siyasi partiyaların sayı 10-a çatıb. Bu barədə Mərkəzi Seçki Komissyasının (MSK) iclasında MSK sədri Məzahir Pənahov məlumat verib. Onun sözlərinə görə, Yeni Azərbaycan Partiyası (YAP), Azərbaycan Demokratik İslahatlar Partiyası, Böyük Quruluş Partiyası, Vətəndaş Birliyi Partiyasının, Bütöv Azərbaycan Xalq Cəbhəsi Partiyası, Milli Dirçəliş Hərəkatı Partiyası, Azərbaycan Demokrat Maarifçilik Partiyası, Azərbaycan Sosial Demokrat Partiyası, Azərbaycan Ümid Partiyası və “Ana Vətən” Partiyası bələdiyyə seçkilərində iştirak etmək üçün MSK-ya müraciət ediblər.

Siyahıdan göründüyü seçkidə iştirak etmək üçün müraciət edən partiyaların 9-u parlamentdə təmsil olunanlardır. Parlamentdə təmsil olunmayan partiyalardan hələlik yalnız Ümid Partiyası seçkidə iştirak etmək üçün MSK-ya müraciət edib.

Araşdırmamız zamanı məlum oldu ki, parlamentdə təmsil olunmayan müxalifət partiyalarının əksəriyyəti bələdiyyə seçkilərində partiya olaraq iştirak etmək niyyətində deyillər. Müsavat Partiyası, AXCP, ALP, KXCP, ALDP, Böyük Azərbaycan Partiyası, Azadlıq Partiyası seçkidə partiya kimi iştirak etməyəcək.